எனது இணைய உரைகள்

அமெரிக்கன் கல்லூரி பேராசிரியர் பிராபாகர், ‘கலைடாஸ்கோப்’ மூலம் கொரோனா ஊரடங்கு காலத்தில் வித்தியாசமான நிகழ்ச்சிகளை நடத்தி வருகிறார்.  கலைடாஸ்கோப், மாற்று கல்வி மற்றும் கலைகளுக்கான பரிட்சார்த்த கூடம்.  ஒரு வகையில் இன்று புற்றீசல் போல் பெருகியிருக்கும் காணொளி உரையரங்கங்களின் முன்னோடி வடிவத்தை கலைடாஸ்கோப்பே உருவாக்கியது.  இன்றைக்கு, இணைய வழிக் கற்றலின் சவால்களை எதிர்மறைத் தன்மையோடு முன்வைக்கிறார் (ஆசிரியன் இறந்து போனான்) என்றாலும், அதன் தேவைகளை அர்த்தபூர்வமாய் முன்னெடுத்ததும் அவர் தாம்.

முதல் சுற்றில், நான் ஆறேழு உரைகளை நிகழ்த்தினேன்.  எல்லாமே இளம் ஆய்வாளர்களுக்கான அறிமுக உரைகள்.  மிகக் கடினமானவை என்று சொல்லப்படும் பல நவீனக் கோட்பாட்டாளர்களின் புத்தகங்களை அறிமுகம் செய்வதாக இந்த உரைகள் அமைந்திருந்தன.  

மிக நீண்ட உரைகள்.  குறைந்த பட்சம் ஒவ்வொரு நாளும் இரண்டு மணி நேரங்கள் வரக்கூடிய உரைகள்.   உள்ளடக்கமோ சொல்லவே வேண்டாம்.  அத்தனை கனம்.  

மிஷல் ஃபூக்கோவின் Discipline and Punish புத்தகத்தோடு தான் அந்த சுற்று ஆரம்பிக்கப்பட்டது என்றால் பார்த்துக் கொள்ளுங்கள்.   அதன் பின் பேசப்பட்ட நான்கு தலைப்புகளும் தமிழுக்கு புதியவை.  ஏறக்குறைய, முதன் முறையாக அவை தமிழில் அறிமுகம் செய்யப்பட்டன என்று கூட சொல்லலாம்.  

அலெய்ன் பாத்யோவின் In Praise of Love

எர்னஸ்டோ லாக்லவ்வின் Emancipation(s)

ஸ்லவோஜ் ஸீசெக்கின் The Sublime object of ideology

டெல்யூஸின் Difference and Repetition

இந்த வரிசையை நான் தேர்ந்தெடுத்ததற்கு ஒரு காரணம் இருந்தது. இவை அனைத்தும் ஒரு வகையில் எனது ‘அயோத்திதாசர் - பார்ப்பனர் முதல் பறையர் வரை’ நூலை வாசிப்பதற்கு துணை செய்யக்கூடியவை.  அதனால், இவை குறித்து கட்டுரைகளை எழுதுவதை விடவும் இப்படி காணொளி உரைகளை வழங்குவது சரியாக இருக்கும் என்று முடிவு செய்தேன்.  அது அப்படியே பலனளிக்கவும் செய்தது.  இந்த உரைகளின் மூலமாக ‘அயோத்திதாசர்’ நூலுக்கு ஏராளமான இளம் வாசகர்கள் கிடைத்தார்கள்.  ஏற்கனவே அந்தப் புத்தகத்தை வாசித்திருந்தவர்கள் கூட இந்த உரைகளைக் கேட்ட பின்பு, புத்தகத்தை திரும்ப வாசிக்க வேண்டும் என்ற முடிவிற்கு வந்து சேர்ந்திருந்தனர்.  இது தமிழில் நடைபெற்ற மிக ஆரோக்கியமான விஷயம்.

இவ்வுரைகளின் சுருக்கமான எழுத்து வடிவத்தை மிகச் சிரத்தையுடன் கார்த்திக் உருவாக்கி வந்தபடி இருந்தார்.  அவை உடனுக்குடன் பகிரவும் பட்டன.   இந்த ஊரடங்கு காலகட்டத்தில் உருப்படியாக நடைபெற்ற ஒன்றிரண்டு விஷயங்களில் இதுவும் ஒன்று.  

அவ்வுரைகளின் காணொளித்தொகுப்புகள் கீழே பகிரப்பட்டுள்ளன.  இவ்வுரைகளைத் தொடர்ச்சியாகக் கேட்பவர்களுக்கு கொரோனா தொற்றாது என்று நிரூபிக்கப்பட்டிருக்கிறது.